Xiinxala Haala Geerarsa Oromoo Jaawwii Maccaa: Ija Yaadiddama Haalawaatiin

Abstract

Kaayyoon qorannoo kanaa haala geerarsa Oromoo Jaawwii Maccaa xiinxaluudha. Ragaaleen qorannoo kanaa Godina Horroo Guduruu Wallaggaa aanaa Jimmaa Gannatiifi Godina Wallagga Bahaa aanaa Eebantuu irraa walitti qabaman. Bakkootni kunniin mala akkayyoon kan filataman yoo ta’an; raghimtoonni ammoo mala darbaa dabarsoon filataman.  Raghimtoota kanneen irraa ragaaleen mala daawwannaa, afgaaffiifi marii garee xiyyeeffannootiin funaanaman. Qorannoon kun dhiyaatina sanyabsaa, paaradaayimii xiinhiikaafi yaadiddama haalawaa fayyadamuun kan geggeeffame yoo ta’u; ragaaleen mala akkamtaa ibsaatiin xiinxalaman. Ragaalee tooftaalee adda addaan funaanaman xiinxaluun argannoowwan qorannichaa bira gahaman nijiru.  Isaan keessaa kan jalqabaa ergaa geerarsa Oromoo Maccaatiin darbu hubachuuf haala jiruufi jireenya hawaasichaa, seenaafi duudhaalee Oromoo ganamaa, hariiroo hirmaattotaa, haala geeraraan dhimma isaa ittiin dabarfatuufi dhaggeeffattootni jalaa cookan, tartiiba ittiin geeraramu, sirna wal harkaa ittiin fudhataniifi xumuran ilaaluun ergaa guutuu ta’e hubachuuf baay’ee barbaachisaa akka ta’etu bira gahame. Argannoon qorannoo kanaa inni biroon, hawaasni Jaawwii Maccaa arjaa, hayyuufi gootaaf kabaja guddaa akka qabaniifi sadan keessaa gootni hunda caalaa kabaja ol’aanaa akka qabutu hubatame. Kanarraa kan ka’e geerarsa osoo hayyuu, arjaafi namootni umriin raagan jiranii qondaalatu eegala.  Qondaalli akka sirna gadaatti dargaggeessa gulantaa kuusaatti diina yookiin bineensota gurguddoo horii miidhuuf dhufan uleen ajjeesuun gootummaa galmeessedha. Yeroo booda garuu mootonni gosaa Jaawwii Maccaa keessatti dhalatan duudhaa Oromoo ganamaa kanarra darbuun abbumti barbaade bineensota gurguddoo biyya fagoo deemanii ajjeesuu akka eegalaniifi kun aadaa Oromoo ganamaa akka hintaanetu hubatame. Geerarsi bakka daboo, waamichaa, ijaarsa manaa, Jila Gadaafi bakkoota hawaasni gammachuuf walga’etti geerarama. Kana malees geerarsa dargaggeessa (dhiira) gulantaa kuusaa (25) ga’eefi ga’eeyyii sanaa olii jireenya keessatti rakkinaafi bal’ina arguun muuxannoofi hubannoo horatantu geerara. kunimmoo haalonni geerarsa Oromoo Jaawwii Maccaa duudhaalee sirna Gadaa waliin hidhata guddaa akka qabaniifi duudhaaleen kun booda jijjiiramaa akka dhufantu bira gahame. Geerarsi kuusaa beekumsaafi seenaa Oromoo Jaawwii Maccaa ta’e kun yeroo ammaa bakkoota hedduutii badee bakkoota qubaan lakkaa’aman qofaatti hafee jira. Kanaaf, Waajjiraaleen Aadaafi Turiizimii sadarkaan jiran geerarsa yoomess dhugaa keessatti geeraramu funaanuun osoo olkuusanii. qorattoonni qorannoo dabalataa osoo geerarsa irratti hojjetaniifi ogeeyyiin sirna barnootaa geerarsa kitaaba barnootaa keessa galchuun dhaloonni bifa barreeffamaan akka baratu osoo taasisanii gaariidha.