Fakkoomii Milkii Ilaallannaa Galumsa Aadaa Fuudhaafi Heerumaa Oromoo Macccaa: Goodina Horroo Gudiruu Wallaaggaa Xiyyeeffachuun

Abstract

Qorannoon kun fakkoomii milkii ilallannaan Oromoo Maccaa, galumsa aadaa Horroo Guduruu Wallaggaa keessatti qabu kan xiinxaledha. Xiyyeeffannoon isaas, aadaafi duudhaa hawaasaa dagatamaa deeme, hambaa beekumsa xabboo dhaloota har’aafi boruuf qorachuun barreffamaan olkaa’uudha. Saxaxni qorannoo kanaa sanyaabsaa ta’ee ibsuun kan qindaa’edha. Dhimma kana irratti maanguddoota waa’ee milkii beekan tooftaalee iddatteessuu darbaa dabarsaan erga filatamanii, af-gaaffii caaseffamaafi marii garee xiyyeeffannoon ragaan walitti qabameera. Ragaaleen guurames ijoo ijootti qoqqooduun, ibsuufi hiikuutiin xiinxalameera. Argannoon ijoon qorannoo kanan adda ba’e, ijaarsa gaalelaa keessati milkiin fakkoomii gochaa namaa, sochiiwwan qaama namaa, biqiloota, beeyladoota, bineessota, allaattiwwan, ilbiisota, waantota, guyyoota torbaniin walqabsiisuu kan ilaallatamu ta’uu isaati. Kan biroon, Oromoon durii kaasee yeroo ijaarsa gaa’elaaf karoorfatee rafee dammaqu, biyya intalaa deemee laga ce’ee galu, barii ganamaa akka milkii ilaallatu hubatameera. Darbee, Oromoon Waaqa balaa adda addaarraa isa oolchu galateeffachuuf; sodaa /dhiphina fuulduratti isa mudatu irraa bilisa ta’uuf; umurii dheerachuuf, jiruuf jireenya nagaa, gammachuufi waan abdatu argachuuf akka itti gargaaramu bira ga’ameera. Argannoolee kana irraa ka’uun, milkiin qajeelfamuun milkaa’ina jiruufi jireenya hawaasichaa waliin waan hidhata qabuuf waajiraaleen Aadaafi Turiizimiifi qorattoonni aadaa, duudhaa hawaasa kana xiyyeeffannoon itti kennamee dhaloota boruuf akka darbu osoo bal’inaan qoratamee dagaagina aadaaf bu’aan isaa olaanaadha.